快來新增一篇文章,將能打開個人文章頁服務!

【台語世界/錄音】新移民國籍thang隨時扯煞 一九盟主張即時修正 | 民報 Taiwan People News

2017/09/18
【台語世界/錄音】新移民國籍thang隨時扯煞 一九盟主張即時修正 | 民報 Taiwan People News

是按怎欲揀這篇:
台灣是一个移民社會,無論是原住民ia̍h是早來、慢到ê移民,lán tī仝一片土地拍拚,所ǹg望--ê lóng是thang踮tsia徛家釘根。新移民ê國籍孤兒問題,需要lán ê關心;台灣ê suí kap好,是「包容多元、尊重差異、重視人權」來tsiânn--ê。

台灣新移民人口到kah六十五萬人,主要是uì越南、印尼、泰國、Hui-li̍t-pin(『菲律賓』)等東協(Tang-hia̍p)國家來--ê,m̄-koh準若the̍h著lán國籍,uan-na可能因為《國籍法》第十九條ê規定hông扯煞(tshé-suah),致使新移民逐工驚惶過日。濟濟專家9月13召開記者會,宣佈beh針對《國籍法》第十九條成立「一九盟」,推sak suà後ê修法、保障新移民基本人權。

新移民對台灣ê語言kap行政程序無熟,tiānn-tiānn因為請文件時ê錯誤ia̍h落勾,或者是hām配偶(phuè-ngóo)起冤家、感情bē ha̍h等原因,hông做套pìnn空,tsiah hōo法院判決in是計謀ê假意結婚,內政部suà--lueh就kā in ê國籍扯煞。根據《國籍法》第十九條規定,歸化台灣tio̍h-ài棄sak母國國籍;nā kā新移民ê歸化許可扯煞,koh in東南亞母國恢復國籍是真困難,liâm-mi就pua̍h落無國籍ê深坑。

政大法律系教授廖元豪表示,一般公民犯著刑法ài罰錢、坐監,甚至ài銃殺等刑事責任,m̄-koh lóng bē kā國籍扯煞,ná ē-tàng為著歹品行國籍就kā tsám hōo去。一个人無交行政罰鍰(hua̍t-huân)「kám講ē比刣人、放火、搶劫koh-khah嚴重?」廖元豪講,就算是無期徒刑ê殺人犯,mā bē kā伊ê國籍tsám掉,移民ê m̄-tsiânn tānn誤suah ē害伊變成無國籍ê孤兒,tsit款政策hōo移民ê生活長期無定著、無在穩。

廖元豪koh講,內政部認定若無合法、歹品行,ē-tàng kā台灣國籍扯煞ê期限是五冬,m̄-koh法院認定ê假意結婚、假意收養等做手代suah無期限。Íng-kuè bat有新移民來台灣超過三十冬,suah因為翁仔某bē ha̍h,配偶kap人串通tènn講移民是三十冬前來台灣假意結婚,致使伊成做無國籍孤兒;mā有起頭tng-teh申請ê時,因為程序無熟致使文件tîng-tânn--去,mā hông認定是leh做手。廖元豪認為,無論是刑事、民事ia̍h行政,lóng無應該kap「國籍扯煞」縛做伙。

南洋台灣姊妹會執行秘書長李佩香(Lí, Puē-hiong、Cambodia語羅馬拼音名姓:Vouch-Heang Lee)表示,台灣有濟濟權益是hām國籍身份縛做伙--ê,但是目前ê法律規定「婚姻新移民」beh歸化台灣國籍lóng tio̍h-ài棄sak母國國籍,若是婚姻情形有改變,ia̍h是入台文件有tîng-tânn,hōo法院判決婚姻無效,新移民隨就ē拄著國籍hông扯煞ê威脅。李佩香身為新移民,bē-tàng接受tsit款迫害人權ê法規,tng政府leh講無論早來、慢到lóng是台灣人ê時tsūn,政策上suah無kā移民並平(pīng-pênn)看待。

勞動人權協會執行長王娟萍講--著,íng-kuè bat針對《國籍法》第十九條召開濟濟記者會,反應法條對新移民徛家釘根有真大ê威脅,新移民the̍h著台灣國籍、the̍h著身份證了後,逐工lóng ài驚若有小可thut-tshuê、若是感情變化,kā兩人ê婚姻講做假意結婚,國籍隨時ē hông扯煞。王娟萍講,法條剝削人權,hōo新移民一世人驚惶,主張即時修正《國籍法》第十九條,明文規定歸化國籍bē-tàng扯煞,若申請ê時有做手等ê違法事由,照刑法ia̍h其他法律處分就好。

讀予你聽:

註:本文使用教育部推薦漢字kap台羅,一寡字詞ê語音kap語意thang上教育部台灣閩南語常用詞辭典查詢。

請佇遮參考華語原文

延伸閱讀:
beh了解「南洋台灣姊妹會」ê上新資訊,你ē-sái追蹤in ê官方網站kap面冊專頁
【台語世界/錄音】半路看--著--ê

若欲投稿,請寄:binpotgb@gmail.com,文章字數 600-800;文章若採用,有淡薄仔稿費。

請上【台語世界】閱讀閣較濟相關文章。


專欄屬作者個人意見,文責歸屬作者,本報提供意見交流平台,不代表本報立場。

comment